پیدایش ۴۷
۴۷
یعقوب فرعونَ برکت دهه
۱ یوسف بوشو فرعونَ بوگفته: «می پئر و می برأرأن، خوشأنٚ گله و رمه و هرچی کی دأشتیدی اوسَدیدی، سرزیمینٚ کنعانٚ جَا بَموییدی، هسه جوشنٚ دورون ایسهییدی.»
۲ یوسف بوشو، پنج نفر جٚه خو برأرأنَ ببرده فرعونٚ ورجه. ۳ فرعون اوشأنَ وَورسه: «چی کاره ایسیدی؟»
اوشأنم فرعونَ جواب بدَییدی: «اَمأن شیمی غولامأن اَمی آبااجدادٚ مأنستن چوپانیم» ۴ و بوگفتیدی: «بَموییم مصر زندگی بوکونیم، چونکی اَمأن شیمی غولامأن علفزاری کنعانٚ دورون اَمی گوسفندأنٚره نأریمی. کنعانٚ میأن خوشکسالی بیداد کونه، پس هسه خوأهش کونیم شیمی غولامأنَ ایجازه بدید جوشنٚ دورون ساکن بیبید.»
۵ فرعون یوسفَ بوگفته: «تی پئر و تی برأرأن بَموییدی تی ورجه، ۶ سرزیمینٚ مصرم تی جُلُو نهَه، وهل بیشید و بهترین جایٚ اَ سرزیمین جاگیرَ بید، وهل جوشنٚ سرزیمینٚ میأن بِیسید. هر کدامٚ اوشأنم کی کاردان و شایسته ایسه، می گابدارأن و گلهدارأن بیبید.»
۷ یوسف خو پئرَ ببرده فرعونٚ حضور، یعقوبم فرعونَ برکت بدَه. ۸ فرعون اونَ وَورسه: «چند سال دأری؟»
۹ یعقوب بوگفته: «صد و سی ساله کی زیمینٚ سر کوچ کودن درم. می عمرٚ سالأن پور جٚه درد و رنج و کوتاه بو و به طولٚ سالأنٚ کوچ کودنٚ می اجداد فَنرسه.» ۱۰ یعقوب فرعونَ برکت بده، وأگردسته بوشو بیرون.
۱۱ یوسف هوطو کی فرعون بوگفتهبو، خو پئر و برأرأنَ بهترین جایٚ مصر، رَمِسیسٚ میأن سامان بدَه و اویه اوشأنَ مِلک فده. ۱۲ خوراکٚ کافییم خو پئر و برأرأن و اوشأنٚ اهلٚ خانه ره فراهم بوکوده.
قحطی سال و یوسفٚ حاکمیت
۱۳ اویه قحطی روز به روز سختترَ بوستی طوری کی سرزیمینٚ مصر و کنعانٚ مردوم جٚه بیخوراکی و خوشکسالی هلاکَ بوستَن دیبید. ۱۴ یوسف تومامٚ پولی کی مردومٚ مصر و کنعان خریدٚ گندمٚ وسی فدَهبید بأورده فرعونٚ قصرٚ دورون. ۱۵ وختی کی مصر و کنعانٚ مردومٚ پول تومامَ بوسته، مصرٚ مردومأن بَموییدی یوسفٚ ورجه بوگفتیدی: «اَمرَ خورد و خوراک فَدن. چره وأ شیمی چومأنٚ جُلُو بیمیریم، هسه کی بیپولیم.»
۱۶ یوسف بوگفته: «هسه کی پول نأریدی، شیمی گاب و گوسفندَ بأورید تا منم به جایٚ شیمی حیوانأن شمرَ گندم فدم.» ۱۷ پس خوشأنٚ حیوانأنَ بأوردیدی فدَییدی یوسفَ، اونم به جایٚ اسبأن و گوسفندأن و بوزأن و گابأن و اولاغأن، اوشأنَ خورد و خوراک فدَه. او سال، اوشأنَ به جایٚ حیوانأنی کی فدَهبید خورد و خوراکٚ کافی فدَه.
۱۸ وختی کی او سال بوگوذشته، سالٚ دیگر بَموییدی یوسفٚ ورجه بوگفتیدی: «سرور شیمی جَا پنهان نییه کی اَمی دار و ندار تومامَ بوسته، حیوانأنم کی شیمیشین بوبوستیدی، اَمِره چیزی باقی نمأنسته به جز اَمی جان و اَمی زیمین. ۱۹ چره وأ اَمأن و اَمی زیمینأن، شیمی چومأنٚ جُلُو نابودَ بیم؟ اَمرَ اَمی زیمینٚ اَمرأ به جایٚ خورد و خوراک بیهین، کی اَمأن، اَمی زیمینٚ اَمرأ فرعونٚشین بیبیم. اَمرَ بذر فَدن کی زنده بمأنیم و نیمیریم، اَمی زیمینم ویرانَ نبه.»
۲۰ پس یوسف، مصرٚ تومامٚ کشتزارأنَ فرعونٚره بیهه. تومامٚ مصریأنم خوشأنٚ زیمینأنَ بوفروختیدی، چونکی خوشکسالی بیداد کودی. تومامٚ سرزیمینٚ مصر فرعونٚشین بوبوسته. ۲۲-۲۱ یوسفم به جز کاهنأن تومامٚ مردومٚ سراسرٚ مصرَ به بندگی ببرده. ولی کاهنأنٚ زیمینَ نیهه، چونکی اوشأن ایتأ مقررییٚ ثابت فرعونٚ جَا فیگیفتیدی، هَنٚ وسی خوشأنٚ زیمینَ نوفروختیدی، چونکی خورد و خوراکٚ کافی دأشتیدی.
۲۳ یوسف مردومَ بوگفته: «هسه کی شمرَ شیمی زیمینٚ اَمرأ فرعونٚ ره بیهم، شمرَ بذر فدم کی بیشید کشت و کار بوکونید. ۲۴ ولی شیمی محصولٚ بردأشتٚ جَا، یک پنجمَ فرعونَ فدید، چار پنجومٚ دیگرم بذرٚ سالٚ بعد و شیمی خانواده و شیمی زأکأنٚ ره خورد و خوراک ببه.»
۲۵ مردوم بوگفتیدی: «شومأن اَمرَ محبت بوکودید اَمی زندگییَ نجات بدَیید. اَمأنم فرعونٚشین بیمی.» ۲۶ پس یوسف ایتأ قانون سرزیمینٚ مصرٚ دورون بنَه، کی تا به ایمروزم باقی بمأنسته، کی یک پنجومٚ بردأشتٚ محصول، فرعونٚشین ایسه. فقط کاهنأنٚ زیمین بو کی فرعونٚشین نوبوسته.
یعقوبٚ وصیت
۲۷ پس بنیایسرائیل ناحیهیٚ جوشنٚ میأن ساکن بوبوستیدی. اویه مِلکی به دس بأوردیدی و زاد و ولد بوکودیدی و فراوانَ بوستیدی. ۲۸ یعقوب هیوده سال مصرٚ میأن زندگی بوکوده، صد و چهل و هفت سال دأشتی. ۲۹ وختی کی یعقوبٚ مردنٚ وخت فأرسه، خو پسر یوسفَ دوخوأده بوگفته: «اگه مرَ دوست دأری، می اَمرأ ایتأ عهد دَوَد کی می اَمرأ وفادار بمأنی و مرَ مصرٚ دورون دفنَ نوکونی، ۳۰ بلکی وختی می اجدادٚ اَمرأ یکی بوبوستم، مرَ مصرٚ جَا بیرون ببری و اوشأنٚ کنار دفنَ کونی.» یوسف بوگفته: «هرچی کی بوگفتی بجا اَورم.» ۳۱ یعقوب بوگفته: «مِره قسم بوخور.» یوسف قسم بوخورده. یعقوبم هوطو کی خو عصایَ تکیه بوکودهبو شکرگزاری بوکوده.
Currently Selected:
پیدایش ۴۷: گیلکی (رشتی)
Označeno
Share
Copy
Want to have your highlights saved across all your devices? Sign up or sign in
© 2010-2019 Gilak Media